Yevlax Pilot Aqroparkında ilk dəfə məhsul yığımına başlanılıb
6 iyun,2023 18:25

Yevlax Pilot Aqroparkında ümumi investisiya həcmi 26 milyon manatdan çox olan 7 sahibkarlıq subyektinə rezidentlik statusu verilib.

 

İqtisadiyyat Nazirliyinin tabeliyində İqtisadi Zonaların İnkişafı Agentliyinin (İZİA) idarəçiliyində olan Yevlax Pilot Aqroparkında ilk dəfə məhsul yığımına başlanılıb. Bununla əlaqədar, Yevlax Pilot Aqroparka mediatur təşkil edilib.

 

İqtisadi Zonaların İnkişafı Agentliyinin İdarə Heyəti sədrinin müavini Zamir Dibirov KİV nümayəndələrinə Yevlax Pilot Aqroparkın ümumi fəaliyyəti barədə məlumat verib. Bildirilib ki, 2021-ci ilin dekabrında rəmzi açılışı olmuş Yevlax Pilot Aqroparkın ümumi ərazisi 2855 hektar təşkil edir, bunun da 1187 hektarlıq hissəsini parsellərə bölünmüş sahələr, 1297 hektarını 3000 başlıq ətlik istiqamətli heyvandarlıq kompleksinin yem təminatı zonası, şəkər çuğunduru, pivəlik arpa və pambıqçılıq sahəsi, 141 hektarını isə emal və sosial zona təşkil edəcək. İndiyədək Pilot Aqroparkda ümumi investisiya həcmi 26 milyon manatdan çox olan 7 sahibkarlıq subyektinə rezidentlik statusu verilib və hazırda bu rezidentlər tərəfindən 130 hektaradan çox ərazidə əkin işləri aparılıb. Bunun da 102 hektarını meyvə bağları, 20 hektarını tərəvəz, 10 hektarını isə tingçilikçilik təşkil edir.

 

Bu layihələrin reallaşması nəticəsində 90 nəfərlik daimi, 192 nəfərlik isə mövsümi iş yeri yaradılacaq.

 

Sonra media nümayəndələri Yevlax Pilot Aqroparkın ilk rezidenti kimi qeydiyyata alınmış “İSFA” MMC-nin təsərrüfatında gedən məhsul yığımı prosesi ilə tanış olublar. “İSFA” MMC-nin direktoru Samir Xeyribəyov fermer təsərrüfatının fəaliyyətindən, yığım prosesindən danışıb. Diqqətə çatdırılıb ki, şirkətin əkin sahəsinin 40 hektarını meyvə bağları, 20 hektarını isə tingçilik təsərrüfatı təşkil edir. Meyvə bağının 8 hektarında ərik, 16 hektarında isə şaftalı və nektarin ağacları əkilib. Hazırda təsərrüfat sahəsində perfect red ərik sortunun, plagold 11 şaftalı sortunun, gartairo nektarin çeşidinin yığımı həyata keçirilir. 

 

Bundan başqa hazırda “İSFA” MMC-nin tingçilik təsərrüfatının 10 hektarında gilasın 15, şaftalı və nektarinin 23, badamın 7, almanın 6, xurmanın 2, əriyin 4, gavalının 5, alçanın 3, armudun 2, qozun 2 çeşidi yetişdirilir.

 

Qeyd edilib ki, “İSFA” MMC tərəfindən Yevlax Pilot Aqroparkına bugünədək 1 milyon manatdan çox investisiya yatırılıb, 11 nəfər daimi iş yeri yaradılıb, həmçinin il ərzində isə 60-dan çox insan mövsümü işlərə cəlb edilir.