Sumqayıt Kimya Sənaye Parkında yaradılan şərait, istehsal müəssisələri ilə tanışlıq, tələbələrin təcrübə proqramlarına cəlb edilməsi imkanlarının araşdırılması və gələcək əməkdaşlıq imkanlarının müzakirə edilməsi məqsədilə Xəzər Universitetinin nümayəndələri ilə “Sumqayıt Kimya Sənaye Parkı” MMC-nin əməkdaşları arasında görüş keçirilib.

Görüşdə “Sumqayıt Kimya Sənaye Parkı” MMC-nin direktoru Elşad Nuriyev ölkədə fəaliyyət göstərən sənaye parkları, burada investorlar üçün yaradılmış əlverişli şərait, sahibkarlar üçün tətbiq edilən vergi və gömrük güzəştləri, “Sumqayıt Kimya Sənaye Parkı” MMC ilə təhsil müəssisələri ilə arasında mövcud əməkdaşlıq əlaqələri barədə məlumat verib.

Xəzər Universitetinin rektoru İradə Xəlilova universitet-sənaye iş birliyinin əhəmiyyəti, universitet tələbələrinin gələcəkdə Sumqayıt Kimya Sənaye Parkında fəaliyyət göstərən sənaye müəssisələrində təcrübə proqramlarında iştirak imkanlarının vacibliyini vurğulayıb.

Görüş çərçivəsində universitetin tələbələrinin Sumqayıt Kimya Sənaye Parkına səfərlərinin təşkilinə, sənaye parkının Peşə Tədris Mərkəzi ilə əməkdaşlığın, parkda fəaliyyət göstərən müəssisələrin praktik baza kimi istifadə olunmaqla birgə elmi tədqiqatların həyata keçirilməsinə dair fikir mübadiləsi aparılıb.

Sonda Xəzər Universitetinin nümayəndələri Sumqayıt Kimya Sənaye Parkının ərazisində görülmüş işlər, Parkın rezidenti “STP” MMC-nin  Elektrik avadanlıqları və Polimer məmulatları zavodunda istehsal prosesi ilə tanış olublar.