Azərbaycanda səfərdə olan İraq Ticarət Palataları Federasiyasının prezidenti Abdulrazaq Al-Zuhirinin başçılıq etdiyi nümayəndə heyəti sentyabrın 29-da Sumqayıt Kimya Sənaye Parkında olublar.

Qonaqlara ölkədə fəaliyyət göstərən sənaye parkları, burada sahibkarlar üçün yaradılmış əlverişli şərait, rezidentlər üçün tətbiq edilən güzəşt mexanizmləri və göstərilən xidmətlər barədə məlumat verilib.

Səfər çərçivəsində nümayəndə heyəti Sumqayıt Kimya Sənaye Parkının rezidenti “Azertexnolayn” MMC-də olub. Qonaqlara məlumat verilib ki, müəssisədə istehsal edilən polad və polietilen borular, hidrotexniki avadanlıqlar, polietilen məmulatlar daxili tələbatı ödəməklə yanaşı, MDB ölkələrinə ixrac edilir.