İqtisadi Zonaların İnkişafı Agentliyinin (İZİA) Peşə Təhsil Mərkəzində 8 Noyabr - Zəfər Gününə həsr olunmuş tədbir keçirilib.

Əvvəlcə 44 günlük Vətən müharibəsində canından keçən qəhrəman şəhidlərimizin xatirəsi bir dəqiqəlik sükutla yad edilib. Sonra tədbir iştirakçıları Peşə Təhsil Mərkəzinin tələbələri tərəfindən Zəfər Günü ilə bağlı hazırlanmış rəsm əsərləri ilə tanış olublar.

Peşə Təhsil Mərkəzinin direktoru Yadullah Babayev və İqtisadi Zonaların İnkişafı Agentliyinin İdarə Heyəti sədrinin müavini Fuad Məhərrəmov hərbçilərimizin cəsarətindən, qəhrəmanlığından bəhs ediblər.

Tədbirdə iştirak edən Vətən müharibəsi iştirakçıları müharibə ilə bağlı xatirələrini tələbələrlə bölüşüblər.

Sonra şəhidlərimizin əziz xatirəsinə həsr olunmuş videoçarx nümayiş olunub, tələbələrin ifasında ədəbi-bədii kompozisiya təqdim edilib.

Tədbirin sonunda Zəfər Günü kompozisiyaları üzrə qaliblər mükafatlandırılıb.